D’Laura Benvenuto ass zënter gutt sechs Joer Infirmière an aus deem Beruff eraus huet si hir Passioun fonnt: Schéinheet. D’Laura mécht sech den Ament mat engem Cabinet d’ésthetique selbstänneg. Fir si soll sech all Mënsch wuel a senger eegener Haut spiere kënnen. Et soll een net engem Schéinheetsideal gläichen, mee d’Laura fënnt, datt all Mënsch e Recht drop huet sech ëm sech selwer kënnen ze këmmeren, sech schéin ze fillen an doheem a sengem Kierper ze sinn.
Et war keen einfache Wee, niewent nach Deelzäit als Infirmière am Spidol ze schaffen a sech gläichzäiteg Independante ze maachen. Mee dat géif hir nei Freed an nei Energie bréngen, seet d’Laura Benvenuto.
D’Liewen als Infirmière hätt sech op hir mental an och physesch Gesondheet ausgewierkt. Et ass e schwéieren an usprochsvolle Beruff. Mee déi nei Erausfuerderung wierkt sech och op der Laura hir Aarbecht als Infirmière aus.
Fréier war d’Laura selwer mat ville Komplexer zu hirem Spigelbild geplot. Si hätt sech deemools eng Persoun gewënscht, déi sech fir si staark gemaach an hir erkläert hätt, datt jidderee genee esou wéi en ass, gutt ass. An déi Persoun wëllt d’Laura elo fir anerer sinn.
